Tumsifu Yesu Kristo. Karibu Katika Masomo ya Misa 05/09/2024
2024 SEPTEMBA 5: ALHAMISI-JUMA LA 22 LA MWAKA
Mt. Teresa wa Kalkuta
Rangi: Nyeupe
Zaburi: Juma 2
Somo 1. 1 Kor 3:18-23
| Mtu asijidanganye mwenyewe; kama mtu akijiona kuwa mwenye hekima miongoni mwenu katika dunia hii, na awe mpumbavu, ili apate kuwa mwenye hekima. Maana hekima ya dunia hii ni upuzi mbele za Mungu. Kwa maana imeandikwa, yeye ndiye awanasaye wenye hekima katika hila yao. Na tena, Bwana anayafahamu mawazo ya wenye hekima ya kwamba ni ya ubatili. Basi, mtu ye yote na asijisifie wanadamu. Kwa maana vyote ni vyenu; kwamba ni Paulo, au Apolo, au Kefa; au dunia, au uzima, au mauti; au vile vilivyopo sasa, au vile vitakavyokuwapo; vyote ni vyenu; nanyi ni wa Kristo, na Kristo ni wa Mungu. |
Wimbo wa Katikati. Zab 24:1-6
|
1. Nchi na vyote viijazavyo ni mali ya Bwana, (K) Nchi na vyote viijazavyo ni mali ya Bwana. 2. Ni nani atakayepanda katika mlima wa Bwana? 3. Atapokea Baraka kwa Bwana, |
Injili. Lk 5:1-11
| Makutano walipomsonga Yesu wakilisikiliza neno la Mungu, Yeye alikuwa amesimama kando ya ziwa la Genesareti, akaona vyombo viwili vimekaa kando ya ziwa, lakini wavuvi wametoka, wanaosha nyavu zao. Akaingia katika chombo kimoja, ndicho chake Simoni, akamtaka akipeleke mbali kidogo na pwani. Akaketi, akawafundisha makutano ali chomboni. Hata alipokwisha kunena, alimwambia Simoni, “Tweka mpaka kilindini, mkashushe nyavu zenu mvue samaki.” Simoni akajibu akamwambia, “Bwana mkubwa, tumefanya kazi ya kuchosha usiku kucha, tusipate kitu; lakini kwa neno lako nitazishusha nyavu.” Basi, walipofanya hivyo walipata samaki wengi mno, nyavu zao zikaanza kukatika; wakawapungia mikono washirika wao waliokuwa katika chombo cha pili, waje kuwasaidia; wakaja, wakavijaza vyombo vyote viwili, hata vikataka kuzama. Simoni Petro alipoona hayo, alianguka magotini pa Yesu, akisema, “Ondoka kwangu, kwa kuwa mimi ni mtu mwenye dhambi, Bwana.” Maana alishikwa na ushangao, yeye na wote waliokuwa pamoja naye, kwa sababu ya wingi wa samaki walioupata; na kadhalika Yakobo na Yohane, wana wa Zebedayo, waliokuwa washirika wa Simoni. Yesu akamwambia Simoni, “Usiogope, tangu sasa utakuwa ukivua watu.” Hata walipokwisha kuviegesha pwani vyombo vyao, wakaacha vyote wakamfuata. |
TAFAKARI
|
TUMSIKILIZE KRISTO ANAYETUFUNDISHA NA KUTUELEKEZA: Petro alikuwa mvuvi mzoefu kama hakupata samaki asingalikuwa na njia ya kuishi. Katika ziwa la Genesareti walivua samaki nyakati za usiku, wakati huu wamejitahidi kuvua usiku kucha bila kupata chochote. Asubuhi wanakutana na Kristo, anaingia katika chombo chao na kuwafundisha watu. Kisha anawaambia; “Tweka mpaka kilindini, mkashushe nyavu zenu mvue samaki.” Simoni akajibu akamwambia, “Bwana mkubwa, tumefanya kazi ya kuchosha usiku kucha, tusipate kitu; lakini kwa neno lako nitazishusha nyavu.” Kama umefanya kazi usiku kucha na hujafanikiwa kwa kweli hutajisikia vizuri asubuhi. Petro alikuwa amechoka na anasafisha nyavu zake baada ya kutafuta Samaki usiku kucha bila kupata. Je! aliamini kuwa angalipata samaki? SALA: Ee Bwana Yesu utuwezeshe kuendelea kuisikiliza sauti yako na kuitii. |
