Tumsifu Yesu Kristo. Karibu Katika Masomo ya Misa 04/06/2024
2024 JUNI 4 : JUMANNE-JUMA LA 9 LA MWAKA
Mt. Fransisko Karachololi
Rangi: Nyekundu
Zaburi: Juma 4
Somo 1. 2 Pet 3:11-15, 17-18
| Ndugu wapendwa, imewapasa ninyi kuwa watu wa tabia gani katika mwenendo mtakatifu na utauwa, mkitazamia hata ije siku ile ya Mungu, na kuihimiza; ambayo katika hiyo mbingu zitafumuliwa zikiungua, na viumbe vya asili vitateketea na kuyeyuka? Lakini, kama ilivyo ahadi yake, tunatazamia mbingu mpya na nchi mpya, ambayo haki yakaa ndani yake. Kwa hiyo, wapenzi, kwa kuwa mnatazamia mambo hayo, fanyeni bidii ili muonekane katika amani kuwa hamna mawaa wala aibu mbele yake. Nanyi uhesabuni uvumilivu wa Bwana wetu kuwa ni wokovu, kama vile na ndugu yetu mpenzi Paulo alivyowaandikia kwa hekima aliyopewa. Basi, wapenzi mkitangulia kujua hayo, jilindeni nafsi zenu, msije mkachukuliwa na kosa la hao wahalifu, mkaanguka na kuuacha uthibitifu wenu. Lakini, kueni katika neema, na katika kumjua Bwana wetu na Mkombozi Yesu Kristo. Utukufu una yeye sasa na hata milele. Amina. |
Wimbo wa Katikati. Zab 90:2-4, 10, 14, 16
|
1. Kabla haijazaliwa milima, wala hujaiumba dunia, (K)Wewe Bwana, umekuwa makao yetu, kizazi baada ya kizazi. 2. Wamrudisha mtu mavumbini, 3. Siku za miaka yetu ni miaka sabini, 4. Utushibishe asubuhi kwa Fadhili zako, |
Injili. Mk 12:13-17
| Walituma kwa Yesu baadhi ya Mafarisayo na Maherodi, ili wamnase kwa maneno. Hata walipofika walimwambia, “Mwalimu, twajua ya kuwa wewe u mtu wa kweli, wala hujali cheo cha mtu; kwa maana hutazami sura za watu; lakini katika kweli waifundisha njia ya Mungu. Je! Ni halali kumpa Kaisari kodi au siyo? Tumpe, tusimpe?” Naye, akijua unafiki wao, akawaambia, “Mbona mmenijaribu? Nileteeni dinari niione.” Wakaileta. Akawaambia, “Ni ya nani sanamu hii na anwani hii?” Wakamwambia, “Ni ya Kaisari.” Yesu akajibu, akawaambia, Mpeni Kaisari yaliyo ya Kaisari, na yaliyo ya Mungu mpeni Mungu.” Wakamstaajabia sana. |
TAFAKARI
|
WAJIBU WETU KWA MUNGU NA KWA JAMII: Katika Liturujia ya Neno leo kwenye Injili tumesikia Yesu akiulizwa swali la mtego ili aingizwe hatiani. Suala la kodi liliigawa sana jamii kwa wakati ule. Endapo Yesu angejibu kuwa ni sawa kulipa kodi kwa Kaisari baadhi ya wafuasi wake wangekwazika na endapo angesema si sawa kulipa kodi kwa Kaisari angekuwa kinyume na mamlaka ya kiserikali. Jibu la Yesu “Ya Kaisari mpeni Kaisari na ya Mungu mpeni Mungu” linatufundisha kutekeleza wajibu wetu kwa Mungu na kwa jamii pasipo kisingizio. Wajibu wetu kwa Mungu ni kumjua, kupenda na kumtumikia kwa kushika vema amri zake. Wajibu wetu wa kulipa kodi kwa mamlaka husika unapaswa kupewa kipaumbele. Ni vizuri mamlaka husika zitoe elimu sahihi kuhusu ulipaji wa kodi na faida zake kama uboreshwaji wa miundombinu mbalimbali ili walipakodi washawishike kulipa kodi bila hila. Pia mamlaka za kodi wawe na mfumo rafiki wa kutoza kodi bila kuwabugudhi walipaji. Sala: Ee Yesu utujalie neema ya kutimiza majukumu yetu kwa Mungu na kwa jamii. |
